Një tragjedi e rëndë ka goditur shtetin e Texas-it në Shtetet e Bashkuara, ku përmbytje të papritura e të furishme kanë marrë jetën e të paktën 24 personave, ndërsa dhjetëra të tjerë rezultojnë ende të zhdukur.
Reshjet ekstreme që nisën natën e 4 korrikut bënë që lumi Guadalupe të fryhej përtej çdo parashikimi, duke arritur nivele historike dhe duke përmbytur shpejt zona të tëra në qendër të shtetit, veçanërisht në kontenë Kerr dhe Kendall.
Në mesin e tragjedisë ndodhet edhe një kamp veror për vajza, Camp Mystic, ku autoritetet raportojnë se deri në 25 vajza rezultojnë të zhdukura.
Përmbytja ndodhi me aq shpejtësi sa shumë njerëz nuk arritën të shpëtonin në kohë. Dëshmitarë në vendngjarje tregojnë për rrjedha të dhunshme uji që morën përpara gjithçka, përfshirë shtëpi, makina dhe njerëz.
Ekipet e shpëtimit kanë bërë përpjekje të jashtëzakonshme, duke përdorur mbi 800 automjete dhe helikopterë për të arritur tek të mbijetuarit. Deri më tani, më shumë se 240 persona janë shpëtuar, 167 prej tyre përmes helikopterëve.
Guvernatori i Texas-it, Greg Abbott, ka shpallur gjendjen e katastrofës dhe ka aktivizuar të gjitha resurset shtetërore për t’u ardhur në ndihmë banorëve. Në të njëjtën kohë, presidenti i SHBA-ve ka ofruar mbështetje federale për të përballuar pasojat e kësaj fatkeqësie natyrore.
Shërbimi Meteorologjik Kombëtar kishte lëshuar paralajmërime për përmbytje të menjëhershme, por ritmi ekstrem i reshjeve dhe mungesa e një sistemi efektiv alarmi në këto zona rurale e bëri të pamundur që të gjithë të arrinin të shpëtonin.
Ndërkohë që operacionet e kërkimit dhe shpëtimit vazhdojnë me intensitet të lartë, autoritetet paralajmërojnë se reshje të tjera të dendura mund të godasin sërish rajonin, duke rrezikuar jetën e shumë të tjerëve.
Familjet e të zhdukurve dhe gjithë komuniteti janë në ankth e tronditje, ndërsa shteti përballet me pasojat e një prej përmbytjeve më të rënda të dekadave të fundit.
Përshtatur shqip nga: The Watchers. Për më shumë detaje: https://watchers.news/2025/07/05/guadalupe-river-catastrophic-flooding-texas-24-dead-dozens-missing/
