Një tjetër masakër tronditëse në shtetin më të rrezikshëm të Meksikës, mes luftës së përgjakshme të karteleve.
Një ngjarje makabre ka tronditur sërish Meksikën: 20 trupa të pajetë, disa prej tyre të dekapituar, janë gjetur në shtetin veriperëndimor të Sinaloas – një ndër zonat më të përfshira nga lufta mes karteleve të drogës.
Sipas autoriteteve lokale, skena ishte e përbindshme. Katër trupa me kokë të prerë u gjetën buzë një rruge, ndërsa 16 të tjerë ndodheshin brenda një automjeti të braktisur afër kryeqytetit të shtetit, Culiacán. Po ashtu, pesë koka të prera ishin futur në një çantë dhe lënë pranë vendit të ngjarjes.
Kjo është vetëm një ndër episodet e shumta të dhunës brutale që ka përfshirë Sinaloan gjatë muajve të fundit, ku fraksionet rivale të kartelit të njohur të Sinaloas luftojnë pa mëshirë për kontrollin e rrugëve të trafikut të drogës – përfshirë edhe rrugët e fentanilit që përfundojnë në tregun amerikan.
Përplasjet janë përqendruar kryesisht mes dy fraksioneve të fuqishme: njëri besnik ndaj Joaquín “El Chapo” Guzmán dhe tjetri ndaj Ismael “El Mayo” Zambada – dy figura historike të botës së krimit në Meksikë.
Dhuna është përshkallëzuar ndjeshëm që prej korrikut 2024, kur autoritetet amerikane arrestuan Zambadën, 76 vjeç, dhe Joaquín Guzmán López-in, 38 vjeç, djalin e “El Chapos”, në një aeroport pranë El Pasos, në SHBA. Arrestimi i tyre ndezi një valë hakmarrjesh dhe përplasje për kontrollin e kartelit.
Zambada ka deklaruar se është rrëmbyer në Meksikë dhe është transportuar në SHBA kundër dëshirës së tij me avion privat – një pretendim që ka trazuar edhe më tej ujërat brenda kartelit. Guzmán López ka pretenduar pafajësinë përballë akuzave për trafik droge në një gjykatë federale në Çikago, ndërsa Zambada është paraqitur në një gjykatë në Nju Jork, ku ka mohuar akuzat për trafik droge, vrasje dhe krime të tjera të rënda.
Vetë “El Chapo” ndodhet në burg në SHBA që nga viti 2019, ku po vuan një dënim të përjetshëm për trafik ndërkombëtar droge.
Ndërkohë, bilanci i dhunës në Sinaloa po bëhet gjithnjë e më tragjik. Mbi 1,200 persona janë vrarë në këtë shtet vetëm në muajt e fundit, sipas shifrave zyrtare.
Që nga viti 2006, Meksika është përfshirë nga një luftë e ashpër kundër krimit të organizuar, me një kosto dramatike: rreth 480,000 të vrarë dhe mbi 120,000 të zhdukur – një plagë e thellë në zemër të një shteti që po mundohet të mbijetojë mes terrorit dhe korrupsionit.
Sinaloa, dikur sinonim i pushtetit të karteleve, sot është kthyer në një rezervuar vdekjeje – ku kufomat janë më të shumta se drejtësia.
