Një penthouse spektakolar në zemër të Manhatanit, në rrokaqiellin më të hollë në botë, ka dalë në treg me një çmim marramendës prej 110 milionë dollarësh.
E quajtur “Crown Suite”, kjo rezidencë e jashtëzakonshme ndodhet në katin më të lartë të ndërtesës 111 West 57th Street, e njohur edhe si Steinway Tower, një ndër rrokaqiejt më të lartë dhe më të hollë në hemisferën perëndimore. Me një raport lartësi-gjerësi prej 24:1, kjo ndërtesë është kthyer në simbol të luksit të ri vertikal në qytetin që nuk fle kurrë.
Apartamenti përfshin katër kate, nga kati i 80-të deri në të 83-in, dhe ofron pamje mahnitëse 360 gradë mbi New York City, përfshirë Central Park-un, i cili duket si një oaz i gjelbër poshtë qiellgërvishtësit. Me një sipërfaqe të bollshme dhe një projektim të realizuar nga Studio Sofield, shtëpia ka gjithsej 5 dhoma gjumi, 6 banjo dhe 2 tarraca private.
Plani i brendshëm përfshin një “suitë për pritje dhe argëtim” në katin e parë, një “suitë kryesore” në katin e tretë, dhe kulmohet me “suitën mbretërore” – një hapësirë luksoze me bar privat dhe sallë kinemaje.
Steinway Tower u përfundua në vitin 2022 në vendin ku dikur ndodhej fabrika historike e pianove Steinway & Sons. E projektuar nga SHoP Architects dhe Studio Sofield, ndërtesa sjell frymën e Epokës së Artë të Nju Jorkut të shekullit XIX, duke kombinuar elegancën klasike me inxhinierinë më moderne të ditëve tona.
Fasada e saj është e veshur me blloqe terakote dhe ndriçimi i ditës e ndryshon pamjen e saj gjatë gjithë orëve, ndërsa brendësia shquhet për materialet luksoze si mermeri, guri gëlqeror, çeliku i zi dhe kadifja. Në hapësirat e përbashkëta, muret janë zbukuruar me vepra arti të Pablo Picasso-s dhe Henri Matisse-it, duke e ngritur përvojën e jetesës në një nivel muzeal.
Ndërtesa ofron gjithashtu një sërë shërbimesh të nivelit të lartë, si një pishinë 25 metra e gjatë, dhoma ngrënieje private dhe një tarracë e gjelbëruar për banorët.
“Në botë ka shumë vende luksoze, por unë doja të krijoja një ndërtesë që nuk mund të ekzistojë askund tjetër përveçse në New York,” u shpreh themeluesi i Studio Sofield, William Sofield, për CNN.
Ky penthouse ndodhet në atë që njihet si Billionaire’s Row, një segment elitar ku rrokaqiejt e hollë dhe të gjatë kanë filluar të dominojnë horizontin e qytetit. Pikërisht aty ndodhet edhe apartamenti më i shtrenjtë i shitur ndonjëherë në SHBA – një hapësirë prej 24,000 metrash katrorë në 220 Central Park South, e cila në vitin 2019 u shit për plot 238 milionë dollarë.
Shtëpia në majë të Steinway Tower nuk është vetëm një pronë – është një deklaratë për luksin, arkitekturën dhe ëndrrën amerikane në versionin e saj më të lartë.
Ky artikull është përshtatur nga një reportazh i publikuar fillimisht në CNN.
