Zgjedhjet e pjesshme lokale të mbajtura të dielën në pesë bashki të vendit kanë përfunduar me fitore për kandidatët e Partisë Socialiste në të gjitha zonat ku u votua. Procesi përfundoi në Vlorë, Tepelenë, Mat, Cërrik dhe Berat, duke konfirmuar dominimin e mazhorancës, por edhe duke nxjerrë në pah një pjesëmarrje shumë të ulët të qytetarëve.
Në Vlorë, fitorja i takoi Brunilda Mersinit nga Partia Socialiste, e cila mori 15.672 vota ose 78.4 për qind. Dionis Sota, i mbështetur nga opozita, siguroi 2.333 vota, ndërsa kandidati i pavarur Gjergj Nika mori 1.975 vota. Në Cërrik, Florenc Doka doli fitues me 66.22 për qind të votave, ose 6.201 në total. Në Berat, Ervin Ceca mori 13.050 vota, duke lënë pas Pavllo Shkarpën me 2.607 vota, një diferencë prej më shumë se 10 mijë votash. Në Tepelenë, Gramos Sako fitoi me 3.261 vota, që përbëjnë 77.8 për qind, ndërsa rivali Gabriel Guma mori 928 vota, ose 22.2 për qind.
Sipas të dhënave të KQZ-së, pjesëmarrja kombëtare ishte vetëm 18.72 për qind. Bashkia me përfshirjen më të ulët të zgjedhësve ishte Vlora me 12.54 për qind, ndërsa më e larta u regjistrua në Mat me 39.36 për qind. Në Berat votuan 19.98 për qind e zgjedhësve, në Cërrik 25 për qind dhe në Tepelenë 34.63 për qind.
Vlora mbetet shembulli më domethënës i apatisë elektorale. Në zgjedhjet e vitit 2023, Partia Socialiste e fitoi bashkinë me 71 për qind të votave, por pjesëmarrja atëherë ishte vetëm 25 për qind. Këtë herë, nga 130.480 qytetarë me të drejtë vote, votuan vetëm 18.039 persona. Kandidatja fituese siguroi 15.672 vota, që përfaqësojnë rreth 8.3 për qind të gjithë trupës elektorale të bashkisë. Kjo tregon se më pak se një në dhjetë vlonjatë morën pjesë për të zgjedhur kryetarin e ri.
Zgjedhjet e pjesshme në Vlorë u zhvilluan pas dorëheqjes së Ermal Dredhës në shtator. Ai kishte fituar në vitin 2023 me 28 mijë vota, por në më pak se dy vjet, interesi i qytetarëve për të votuar është ulur ndjeshëm. Të dhënat tregojnë se numri i votuesve aktivë në qytet ka rënë me afro 20 mijë persona krahasuar me zgjedhjet e mëparshme.
Partia Socialiste ruajti të gjitha bashkitë në garë, por rezultatet shënuan edhe një tjetër realitet: fitoret politike po shoqërohen me një pjesëmarrje gjithnjë e më të zbehtë.
