Goditje e fortë për qeverinë Rama: SPAK ka shpallur ministren e Infrastrukturës dhe Energjisë, Belinda Balluku, zyrtarisht të pandehur në dosjen e bujshme të tenderit të tunelit të Llogarasë, me vlerë gati 19 miliardë lekë.
Në njoftimin zyrtar, Prokuroria e Posaçme bën me dije se Balluku akuzohet për “Shkelje të barazisë së pjesëmarrësve në tendera apo ankande publike”, vepër penale e parashikuar nga neni 258 i Kodit Penal, e kryer në bashkëpunim.
Procedura që ndodhet nën hetim lidhet me kontratën për ndërtimin e tunelit të Llogarasë, zhvilluar fillimisht në dhjetor 2020, më pas e anuluar dhe rihapur në qershor 2021. SPAK e ka thirrur Ballukun në cilësinë e të pandehurës pas njoftimit zyrtar të datës 21 tetor 2025.
Ky zhvillim shënon futjen e parë zyrtare të një ministre në detyrë në fazën e akuzës formale nga SPAK, një hap që mund të pasohet nga masa sigurie nëse hetimet forcojnë provat ndaj saj.
Statusi i “të pandehurës” nënkupton se prokuroria ka kaluar nga verifikimet paraprake në ngritjen e akuzës penale, duke e futur Ballukun në orbitën direkte të drejtësisë penale.
Hetimet e SPAK për tenderat publikë në Ministrinë e Infrastrukturës dhe në Autoritetin Rrugor Shqiptar janë ndër më të gjatat e këtij viti dhe përfshijnë disa ish-zyrtarë të arrestuar më herët.
Qeveria ende nuk ka reaguar për zhvillimin e sotëm, që shihet si një nga goditjet më të rënda politike të vitit për kabinetin Rama.
