Një grabitje e rrallë në Muzeun e Luvrit ka tronditur Francën, pasi disa nga bizhuteritë më të vlefshme të historisë u morën në një operacion që zgjati vetëm shtatë minuta. Sipas CNN, hajdutët synuan Galerinë Apollo, ku ruhen Xhevahiret e Kurorës Franceze, duke përfshirë dhurata perandorake dhe objekte me vlerë të jashtëzakonshme historike.
Hajdutët thyen dy vitrina sigurie dhe morën nëntë objekte të rralla, më pas u larguan me motoçikleta. Një prej tyre, kurora e arit e Perandoreshës Eugénie, u gjet pranë vendit të ngjarjes. Eksperti i artit Arthur Brand e quajti këtë një katastrofë kombëtare për Francën, duke theksuar se këto janë bizhuteritë e Napoleonit, të gruas së tij dhe të pasardhësve, krenaria e vendit. Ai shtoi se për shkak të njohjes së madhe të këtyre veprave, hajdutët mund t’i çmontojnë për t’i shitur gurët dhe për të shkrirë arin e argjendin.
Objektet e vjedhura përfshijnë një set me safirë që ka qenë në pronësi të disa mbretëreshave franceze, me një diademë, varëse dhe një vath të vetëm, të stolisura me 24 safirë nga Ceiloni dhe 1083 diamante. Një tjetër pjesë ishte varësja me smeraldë që Napoleoni ia dhuroi gruas së tij Maria-Luise të Austrisë në vitin 1810, e punuar me 32 smeraldë dhe më shumë se një mijë diamante.
U mor gjithashtu një karficë e rrallë fetare e Perandoreshës Eugénie, e krijuar në vitin 1855 dhe e zbukuruar me 94 diamante, përfshirë dy diamante Mazarin të shekullit XVII. Një tjetër karficë e vjedhur ishte ajo në formë fjongo me mijëra diamante, dikur pjesë e një rripi të madh zbukurimi që Eugénie e kishte veshur në pritje mbretërore.
Mes sendeve të marra ishte edhe diadema e saj me perla, e punuar në vitin 1853 me 212 perla dhe 1998 diamante. Kurora e arit e Eugénie-s, e stolisur me 1354 diamante dhe 56 smeraldë, u gjet më vonë jashtë muzeut, e dëmtuar.
Ngjarja ka shkaktuar tronditje në Francë dhe jashtë saj. Autoritetet po hetojnë për të gjetur autorët dhe për të rikthyer thesaret që përfaqësojnë një pjesë të lavdisë historike të vendit.
Burimi: CNN
