Në një seancë të tensionuar në Senatin amerikan, Prokurorja e Përgjithshme e Shteteve të Bashkuara, Pam Bondi, u përball me pyetje të ashpra nga senatorët demokratë, të cilët e akuzuan për politizimin e Departamentit të Drejtësisë. Nga ana tjetër, republikanët e mbrojtën, duke vlerësuar angazhimin e saj për të rikthyer fokusin e sistemit ligjor te “lufta kundër krimit të vërtetë”.
Kjo ishte paraqitja e parë e Bondit përpara Komisionit të Drejtësisë të Senatit, të dominuar nga republikanët, që prej akuzave të ish-drejtorit të FBI-së, James Comey, për deklarata të rreme dhe pengim të hetimeve të Kongresit. Comey, një kritik i njohur i ish-presidentit Donald Trump, pritet të dalë para gjykatës të mërkurën.
Gjatë dëshmisë së saj, Bondi theksoi se Departamenti i Drejtësisë po “kthehet në misionin e tij thelbësor – luftën ndaj krimit të dhunshëm”, duke përmendur rritjen e ndërhyrjeve federale në qytete si Washington D.C. dhe Memphis, Tennessee.
Ajo mbrojti gjithashtu vendimin për të dislokuar trupat e Gardës Kombëtare në qytete si Çikago dhe Portland, duke deklaruar se qeveritë vendore kishin dështuar të garantonin sigurinë e qytetarëve. Bondi lidhi problemet e rendit publik edhe me bllokimin e funksionimit të administratës federale, duke akuzuar demokratët se po “minojnë gatishmërinë e zbatimit të ligjit”.
Një nga momentet më të debatueshme të seancës ishte arsyetimi i saj për ndjekjen penale të Comeyt, për të cilin ajo refuzoi të komentonte nëse vendimi kishte ardhur nën ndikim politik. “Nuk diskutoj çështje që lidhen me komunikimet e brendshme të administratës,” tha Bondi, duke e cilësuar çështjen si “personale”.
Një tjetër pikë përplasjeje ishte çështja e dosjeve të Jeffrey Epstein, ku Bondi refuzoi të shpjegonte pse kishte ndalur publikimin e dokumenteve. Në vend të kësaj, ajo akuzoi disa senatorë demokratë se kishin marrë fonde elektorale nga bashkëpunëtorë të miliarderit të ndjerë.
Demokratët ngritën gjithashtu pikëpyetje për akuzat ndaj ish-zëvendësministrit të sigurisë kufitare, Tom Homan, i cili dyshohet se kishte marrë 50 mijë dollarë nga agjentë nën mbulim. Bondi tha se vendimi për të mbyllur hetimin ishte marrë përpara se ajo të merrte detyrën dhe nuk komentoi nëse fondet ishin rikuperuar.
Senatori demokrat Dick Durbin, kryetar i pakicës në komision, e akuzoi Bondin se kishte “shndërruar Departamentin e Drejtësisë në një mburojë politike për presidentin dhe aleatët e tij”. Ai shtoi se administrata e Bondit kishte “lënë një njollë të madhe në historinë amerikane që do të kërkojë dekada për t’u shlyer”.
Gjatë mandatit të saj, një numër i madh prokurorësh federalë dhe zyrtarësh të lartë të Departamentit të Drejtësisë janë larguar ose transferuar, veçanërisht ata të përfshirë në hetimet ndaj ish-presidentit Trump dhe ngjarjeve të 6 janarit 2021 në Kapitol.
Pak orë para seancës, rreth 300 ish-punonjës të Departamentit të Drejtësisë publikuan një letër të hapur, duke paralajmëruar se administrata aktuale po “shkatërron themelet e institucionit” dhe duke bërë thirrje për rikthim në normat tradicionale të pavarësisë së drejtësisë.
Burimi: AFP, Al Jazeera, agjenci ndërkombëtare lajmesh
