Ditën e djeshme, në fshatin Pirg të Maliqit, një konflikt i nisur mes dy adoleshentëve u mbyll me vrasje. Enedio Guri, 14 vjeç, goditi me thikë në zemër bashkëmoshatarin e tij, Erald Xhejo, duke i shkaktuar vdekjen pak pasi u dërgua në spitalin e Korçës.
Ngjarja ndodhi pranë një lokali, ku dy të miturit kishin shkuar për t’u sqaruar pas një mosmarrëveshjeje të mëparshme.
Hetimet e policisë zbuluan se pas goditjes, xhaxhai i autorit mori thikën, e pastroi dhe e fshehu për të humbur gjurmët, ndërsa babai e ndihmoi djalin të largohej për t’iu shmangur policisë. Në total u arrestuan tetë persona: autori i dyshuar, babai dhe xhaxhai i tij, katër të mitur të tjerë dhe një 34-vjeçar që e shoqëroi në arratisje. Të gjithë akuzohen për vrasje, fshehje provash dhe pengim të hetimeve.
Ngjarja nxjerr në pah përshkallëzimin e dhunës mes të miturve dhe boshllëqet në kontrollin prindëror e institucional. Një adoleshent humbi jetën në moshën kur duhej të ishte ende në bankat e shkollës, ndërsa tjetri, pavarësisht trajtimit që parashikohet për të miturit, do të përballet me pasojat e përfshirjes në sistemin penitenciar, duke u shkëputur nga jeta e zakonshme dhe nga një rini normale, pa mundur të jetë më i njëjti.
Raste të tilla tregojnë se edukimi i fëmijëve kërkon vëmendje më të madhe nga familjet, shkollat dhe institucionet. Mungesa e ndërhyrjes në kohë, e komunikimit dhe e mbikëqyrjes, shpesh përfundon në pasoja të pariparueshme, si rasti më i fundit, ku dy familje mbeten të shkatërruara: njëra nga humbja e fëmijës, tjetra nga humbja e së ardhmes së tij.
Ndaj ngjarja në Maliq është lajm që nuk duhet thjesht raportuar – ajo kërkon reflektim. Është momenti që prindërit, autoritetet, dhe komuniteti të rishikojnë rolin e tyre në rritjen e brezit që po humbet kontrollin emocional dhe moral.
