Në episodin e fundit të podcastit “Flasim”, Kryeministri Edi Rama reagoi me tone të ashpra ndaj vendimit të GJKKO-së për pezullimin nga detyra të ministres Belinda Balluku, duke e cilësuar atë “një shpikje të padëgjuar në Europë” dhe duke artikuluar publikisht arsyetimin juridik që shumëkush e interpretoi si një udhëzim të drejtpërdrejtë për Gjykatën Kushtetuese.
Rama deklaroi se gjykatat “nuk kanë kompetencë të pezullojnë anëtarë të qeverisë”, pasi sipas tij një veprim i tillë “cenon parimin e ndarjes së pushteteve dhe merr kompetencat ekskluzive të Kryeministrit dhe Presidentit”.
“Gjyqësori NUK duhet të pezullojë ministra. Asnjëherë! Askund në Europë!”, u shpreh Rama.
Ai pohoi se referohej në qëndrimet e Komisionit të Venecias dhe Gjykatës Europiane të Strasburgut, të cilat — sipas interpretimit të tij — nuk lejojnë ndërhyrje të gjyqësorit në përbërjen e ekzekutivit.
“Ministri largohet vetëm me dorëheqje, me vendim të Kryeministrit ose me dënim të formës së prerë,” deklaroi ai.
Mesazhi i sotëm u lexua gjerësisht si një presion publik ndaj Gjykatës Kushtetuese, e cila pritet të shqyrtojë çështjen, ndërsa Rama e cilësoi pezullimin gjyqësor si rrezik për rendin demokratik dhe funksionimin institucional të qeverisë.
“Uroj që Gjykata Kushtetuese t’ia kursejë këtë shfaqje Shqipërisë!”, tha Kryeministri, frazë që nga analistët politikë u interpretua si një sinjal i qartë për vendimin që ai pret nga gjyqtarët.
Sipas komenteve në skenën politike, ky qëndrim publik mund të shërbejë edhe si “garanci narrative”, në mënyrë që, nëse vendimi i Gjykatës Kushtetuese nuk përputhet me pritshmëritë e qeverisë, Rama të deklarojë se ka bërë “gjithçka të mundur”, duke zhvendosur përgjegjësinë tek drejtësia.
Vendimi i Gjykatës Kushtetuese pritet në ditët në vijim dhe konsiderohet një test i rëndësishëm për ndarjen e pushteteve në vend.
