Ukraina po përballet me një situatë të tensionuar politike pas largimit të Andriy Yermak, figurës më të afërt të Presidentit Volodymyr Zelensky dhe drejtuesit kryesor të ekipit negociator në bisedimet për paqen me Rusinë. Dorëheqja e tij vjen në të njëjtën ditë kur organet antikorrupsion kontrolluan banesën e tij në Kiev, në kuadër të një hetimi të gjerë të lidhur me dyshime për abuzime në sektorin e energjisë.
Kontrolli është kryer nga Byroja Kombëtare Kundër Korrupsionit dhe Prokuroria e Specializuar Kundër Korrupsionit, të cilat prej disa javësh hetojnë një skemë të dyshuar ryshfeti me vlerë të lartë. Yermak, që ka qenë mik i ngushtë dhe bashkëpunëtor politik i Zelenskyt prej shumë vitesh, konfirmoi se ka bashkëpunuar me autoritetet, ndërsa nuk ka ende një të dhënë zyrtare mbi statusin e tij procedural.
Largimi i tij krijon pasiguri të dukshme për procesin e negociatave, pasi ai ka kryesuar delegacionin ukrainas në bisedimet e fundit të zhvilluara në Gjenevë me ndërmjetësimin e SHBA. Raundi i radhës i diskutimeve pritet të zhvillohet së shpejti, por ende nuk dihet se kush do të marrë drejtimin e ekipit. Nga zyra presidenciale është bërë e ditur vetëm se delegacioni do të përbëhet nga përfaqësues të ushtrisë, diplomacisë, Këshillit të Sigurisë Kombëtare dhe shërbimeve inteligjente.
Ndërkohë, presioni ndërkombëtar mbi Kievin është rritur pasi administrata amerikane paraqiti një draft prej 28 pikash për marrëveshjen e paqes, i cili është kundërshtuar fuqishëm nga Ukraina dhe disa vende europiane, pasi përfshin kërkesat maksimale të Rusisë, përfshirë heqjen dorë nga territoret e pushtuara dhe frenimin e aspiratave në NATO.
Kontrolli i banesës së Yermak dhe tensionet brenda qeverisë vijnë në një moment kritik, teksa Ukraina vazhdon përballjen me korrupsionin e brendshëm – një nga faktorët kyç që lidhet me procesin e anëtarësimit në Bashkimin Europian. Episodi i fundit është cilësuar nga analistët si goditja më e fortë politike ndaj Zelenskyt që prej nisjes së konfliktit, duke rritur presionin për ndryshime të mundshme në strukturat drejtuese.
E ardhmja e negociatave për paqen mbetet e paqartë, ndërsa vëmendja ndërkombëtare është e përqendruar te lëvizjet e radhës të Kievit në skenën diplomatike dhe politike.
