Presidenti rus Vladimir Putin deklaroi se një plan i propozuar nga Shtetet e Bashkuara për t’i dhënë fund luftës në Ukrainë mund të shërbejë si “bazë për marrëveshje të ardhshme”, por paralajmëroi se Moska është e gatshme të pushtojë më shumë territor me forcë, nëse Kievi nuk tërhiqet.
Duke folur para gazetarëve të enjten në Bishkek, në Kirgistan, Putin konfirmoi se Kremlini pret vizitën e një delegacioni amerikan të kryesuar nga i dërguari special Steve Witkoff në fillim të javës së ardhshme. Ai shtoi se Moska është e gatshme për një “diskutim serioz”.
Megjithatë, perspektiva për një marrëveshje të shpejtë duket e zbehtë, pasi Putin përsëriti kërkesat maksimale të Kremlinit, duke theksuar se lufta do të përfundojë vetëm “kur trupat ukrainase tërhiqen nga territoret që kanë pushtuar”.
“Nëse ata nuk tërhiqen, ne do ta arrijmë këtë me mjete ushtarake”, deklaroi ai.
Presidenti ukrainas Volodymyr Zelensky njoftoi se delegacioni i tij do të takohet me zyrtarë amerikanë deri në fund të kësaj jave për të diskutuar pikat e përcaktuara më herët në Gjenevë. Në adresimin e tij të mbrëmjes, Zelensky shtoi se javën e ardhshme do të ketë “negociata të rëndësishme, jo vetëm për delegacionin tonë, por edhe për mua personalisht”, pa dhënë detaje të tjera.
Aktualisht, Rusia mban të pushtuar rreth 20% të territorit ndërkombëtarisht të njohur si pjesë e Ukrainës, përfshirë pothuajse të gjithë rajonin e Luhanskut dhe pjesë të Donetskut, Khersonit dhe Zaporizhzhias. Moska kërkon që Ukraina të dorëzojë zyrtarisht të katër këto rajone, të cilat i ka aneksuar, por nuk i kontrollon tërësisht.
Forcat ruse kanë shënuar disa përparime në javët e fundit në lindje të Ukrainës, veçanërisht rreth qytetit të Pokrovskut. Megjithatë, sipas Institutit për Studimin e Luftës (ISW), të dhënat tregojnë se “një fitore ushtarake ruse nuk është e pashmangshme, dhe një pushtim i shpejtë i pjesës së mbetur të Donetskut nuk duket i afërt”.
Zona që Rusia kërkon të marrë përfshin një “brez fortifikimesh” të qendrave urbane të mbrojtura rëndë, të konsideruara jetike për sigurinë e Ukrainës. Kievi dhe aleatët evropianë kanë përsëritur se lëshimet territoriale janë një vijë e kuqe e pakalueshme.
Deklaratat e Putinit vijnë në një kohë kur zyrtarë amerikanë – përfshirë edhe Donald Trump – kanë folur për “përparim të jashtëzakonshëm” drejt një zgjidhjeje diplomatike. Kjo pasoi kundërshtimin e ashpër të Ukrainës dhe vendeve evropiane ndaj një draft-plani paqeje me 28 pika të hartuar nga SHBA-të, me ndikim të dukshëm rus, i cili fillimisht kërkonte që Ukraina të reduktonte ushtrinë dhe të hiqte dorë nga aspiratat për anëtarësim në NATO.
Putin konfirmoi se pret Witkoff në Moskë javën e ardhshme për të diskutuar versionin e ri të draftit, formulimi i të cilit mbetet ende i paqartë. Ai tha se është informuar për bisedimet e fundit dhe se plani mund të “përbëjë bazën për marrëveshjet e ardhshme”.
“Do të ishte e pahijshme të flisja për marrëveshje përfundimtare tani”, shtoi Putin.
