Një aksion i koordinuar mes autoriteteve shqiptare dhe atyre europiane ka çuar në shkatërrimin e një prej rrjeteve më të mëdha të trafikut të kokainës që vepronte mes Amerikës së Jugut dhe Evropës. Prokuroria e Posaçme (SPAK) njoftoi se në kuadër të hetimeve të përbashkëta me strukturat antimafia italiane dhe drejtësinë zvicerane, janë lëshuar masa sigurie për 21 persona, ndërsa 10 prej tyre janë ndaluar nga policia në Itali gjatë bastisjeve të zhvilluara mëngjesin e së enjtes.
Sipas hetimeve, grupi kriminal dyshohet se ka transportuar rreth 1.3 tonë kokainë drejt tregut europian, duke krijuar gjashtë qendra të fshehta magazinimi dhe shpërndarjeje në territorin italian. Operacioni çoi gjithashtu në sekuestrimin e 130 kilogramëve lëndë narkotike, 550 mijë eurove në para të thata, 10 automjeteve dhe një armë zjarri.
Një element i veçantë i dosjes është arrestimi i oficerit të Policisë së Shtetit Igli Haxhiaj, i cili dyshohet se ka nxjerrë informacione të klasifikuara nga brenda hetimit në këmbim të pagesave financiare. SPAK njoftoi se për Haxhiajin është vendosur masa e sigurisë “arrest në burg”, nën akuzat për shpërdorim detyre, zbulim të sekretit hetimor dhe korrupsion pasiv.
Sipas burimeve pranë prokurorisë, dyshohet se vjedhja e informacionit ka rrezikuar operacionin ndërkombëtar, duke detyruar organet ligjzbatuese të veprojnë më shpejt nga afatet e planifikuara.
Nga personat për të cilët është kërkuar masa sigurie, 6 ndodhen në Shqipëri dhe 3 janë vënë në pranga në territorin shqiptar.
SPAK thekson se hetimet vazhdojnë për të identifikuar aktorë të tjerë të përfshirë dhe për të ndjekur rrjedhën e parave të përfituara nga trafiku.
