Ish-kryetari i Reform UK në Uells dhe ish-eurodeputeti, Nathan Gill, është dënuar me 10 vite e gjysmë burg nga Gjykata Qendrore e Londrës, pasi pranoi se ka marrë shuma të mëdha parash nga burime pro-ruse me qëllim përhapjen e mesazheve pro-Kremlinit brenda institucioneve europiane.
Sipas vendimit gjyqësor të dhënë nga gjykatësja Bobbie Cheema-Grubb, 52-vjeçari përdori pozitën e tij politike për t`u shërbyer interesave të huaja, duke dëmtuar besimin publik dhe integritetin e Parlamentit Europian. Ajo theksoi se Gill “shfrytëzoi autoritetin e tij për të manipuluar proceset demokratike”.
Hetimet e Policisë Kundër Terrorizmit treguan se Gill ishte paguar nga politikanë pro-rusë në Ukrainë mes dhjetorit 2018 dhe korrikut 2019, ndër ta Oleg Voloshyn—i cili më vonë u përfshi në listën e sanksioneve të SHBA-së dhe u akuzua për tradhti në vendin e tij. Në këmbim të pagesave, Gill ka mbajtur fjalime të përgatitura nga bashkëpunëtorë rusë, është paraqitur në media sipas udhëzimeve të tyre dhe ka synuar të përfshijë edhe eurodeputetë të tjerë.
Në pajisjet e sekuestruara pas arrestimit të tij në aeroportin e Mançesterit në vitin 2021, autoritetet gjetën komunikime të koduara ku diskutoheshin transfertat financiare dhe strategjitë e ndikimit politik.
Reform UK e dënoi ashpër veprimin e ish-zyrtarit të saj, duke deklaruar se Gill nuk ka më asnjë lidhje me partinë. Nigel Farage, udhëheqës aktual i forcës politike, u distancua nga rasti, duke thënë se nuk kishte qenë në dijeni të aktiviteteve të tij—një situatë që rrezikon t’i sjellë pasoja në klimën aktuale politike dhe akuzave për qëndrim të butë ndaj Moskës.
Rasti ka shkaktuar një tronditje të re në politikën britanike, duke ngritur pikëpyetje të thella mbi ndërhyrjet e huaja dhe sigurinë e institucioneve demokratike europiane.
