Gjykata e Posaçme Kundër Korrupsionit dhe Krimit të Organizuar (GJKKO) vendosi sot të mos ndryshojë masat e sigurisë ndaj zv/kryeministres së pezulluar dhe ministres së Infrastrukturës dhe Energjisë, Belinda Balluku, si dhe ndaj dy zyrtarëve Gentian Gjyli, drejtues i ARRSH-së, dhe Erald Elezi, kreu i KESH-it.
Pas një seance që zgjati rreth pesë orë, gjyqtari Erjon Çela vendosi të lërë në fuqi masën e pezullimit nga detyra dhe ndalimin e daljes jashtë shtetit për Ballukun, ndërsa për Gjyli dhe Elezi mbetet masa e “arrestit në shtëpi”. Të tre janë marrë të pandehur për akuzën e “Shkeljes së barazisë së pjesëmarrësve në tendera apo ankande publike”, në lidhje me procedurat e ndërtimit të tunelit të Llogarasë dhe Unazës së Jashtme të Tiranës, Loti 4.
SPAK u përfaqësua në seancë nga prokurori Dritan Prençi, ndërsa Balluku u mbrojt nga avokatët Pamela Qirko dhe Ardian Kalia. Gjatë gjithë procesit, zv/kryeministrja e pezulluar nuk preferoi të fliste në seancë përtej deklarimit formal të identitetit.
Belinda Balluku mbërriti në ambientet e GJKKO-së në orën 09:00 të mëngjesit, duke kaluar pa dhënë asnjë prononcim për mediat e pranishme. I njëjti qëndrim u përsërit edhe pas mbylljes së seancës: rreth orës 14:37, Balluku doli nga gjykata e shoqëruar nga bashkëpunëtorët dhe stafi i saj, duke refuzuar t’u përgjigjej pyetjeve të gazetarëve. Ajo u largua në heshtje, pa bërë asnjë koment publik mbi vendimin.
Mbrojtja e saj ka njoftuar se do t’i drejtohet Gjykatës së Apelit për rishqyrtimin e masave të vendosura.
