Një vendim gjyqësor në Korçë ka ndezur debat të fortë publik, pasi Gjykata vendosi të ndryshojë masën e sigurisë për Leonidha Guçen dhe Denis Meçen, të dyshuar si autorë të vrasjes së Egli Proga, ngjarje e ndodhur më 10 gusht 2024. Të dy autorët, që më herët mbaheshin në paraburgim, do të vijojnë procesin në kushtet e arrestit shtëpiak.
Sipas gjykatës, zbutja e masës së sigurisë lidhet me përfundimin e afatit ligjor të paraburgimit dhe ecurinë e ngadaltë të hetimeve. Çështja është ende në proces, ndërsa autoritetet presin rezultatet e ekspertimit të pamjeve filmike të marra nga lokali “Stropcka”, ku ndodhi vrasja. Një pjesë e videove dyshohet se është fshirë, duke detyruar dërgimin e pajisjes së regjistrimit jashtë vendit për rikuperim të të dhënave.
Avokatët e të dyshuarve përdorën pikërisht këtë vonesë procedurale si argument për të kërkuar lirimin nga paraburgimi, kërkesë që gjykata e miratoi. Ndërkohë, tre persona të tjerë të përfshirë në ngjarje janë liruar më herët dhe aktualisht nuk ndodhen nën masë sigurie.
Prokuroria vazhdon hetimet për veprën penale “vrasje me dashje” të kryer në bashkëpunim, ndërsa Denis Meçe ka pranuar rolin e tij në krim dhe ka përfshirë Leonidha Guçen si bashkëautor. Megjithatë, pas më shumë se 15 muajsh nga ngjarja, organi i akuzës ende nuk ka siguruar prova të plota për të dërguar dosjen në gjyq.
Ky vendim ka rikthyer vëmendjen te funksionimi i drejtësisë dhe çështja e zvarritjeve procedurale, duke ngritur pyetje për ndëshkimin e krimeve të rënda dhe besimin e publikut tek institucionet.
