Sot po zhvillohen zgjedhjet e pjesshme vendore për zgjedhjen e kryebashkiakëve në pesë bashki: Vlorë, Berat, Cërrik, Mat dhe Tepelenë.
Qendrat e votimit u hapën në orën 07:00 dhe do të qëndrojnë të hapura deri në orën 18:00. Procesi është zhvilluar qetë në orët e para të mëngjesit, edhe pse pjesëmarrja ka rezultuar e ulët në shumicën e zonave. Deri tani, bashkia e Matit raportohet me përfshirjen më të lartë të votuesve, ndërsa Vlora renditet me pjesëmarrjen më të ulët.
Sipas Komisionit Qendror të Zgjedhjeve, procesi i votimit po vijon normalisht dhe pritet që numërimi i votave të përfundojë brenda ditës së hënë në mesditë, nëse ritmet aktuale të pjesëmarrjes mbeten të njëjta.
Këto zgjedhje organizohen për të plotësuar vendet vakante në drejtimin e pesë bashkive, me një numër total prej rreth 335 mijë qytetarësh që kanë të drejtë vote në këto zona.
