Pas më shumë se dy dekadash në majat e futbollit botëror, Cristiano Ronaldo po përgatitet të mbyllë një nga kapitujt më të lavdishëm në historinë e këtij sporti. Ylli portugez, tashmë 40 vjeç dhe pjesë e klubit Al Nassr në Arabinë Saudite, ka bërë të ditur se po mendon seriozisht për tërheqjen nga futbolli, duke vënë në plan të parë kohën me familjen dhe jetën jashtë fushës së blertë.
Me 952 gola në karrierë për klube dhe kombëtare, Ronaldo mban rekordin si golashënuesi më i mirë i të gjitha kohërave. Pavarësisht formës së mirë që ende tregon në fushë, ai duket se ka filluar të shohë përtej kufijve të sportit që e bëri legjendë. Burime pranë lojtarit bëjnë të ditur se ai po planifikon fazën e re të jetës së tij, të fokusuar te bizneset personale, filantropia dhe rritja e fëmijëve të tij.
Ronaldo, i cili ka fituar gjithçka që një futbollist mund të ëndërrojë – nga pesë Topa të Artë deri te trofetë me Real Madrid, Manchester United e kombëtaren portugeze – pritet të lërë pas një trashëgimi të jashtëzakonshme.
Edhe pse nuk ka caktuar një datë të saktë për lamtumirë, gjithnjë e më shumë sinjale tregojnë se fundi i karrierës së tij është afër. Sipas mediave sportive ndërkombëtare, Ronaldo dëshiron të largohet me dinjitet, duke i dhënë fund rrugëtimit të tij në momentin e duhur, si një kampion që di të respektojë jo vetëm lojën, por edhe veten.
Në një kohë kur shumë të rinj e shohin si model frymëzimi, Cristiano Ronaldo po tregon se suksesi nuk matet vetëm me gola e trofe, por edhe me mënyrën se si di të mbyllësh një epokë të lavdishme.
