Bayern Munich vazhdon marshimin e sigurt në Ligën e Kampionëve, duke dhënë një tjetër shfaqje bindëse përpara tifozëve të vet në “Allianz Arena”. Gjermanët fituan me rezultatin e pastër 3-0 ndaj Club Brugge, në një ndeshje që u zgjidh praktikisht brenda pjesës së parë.
Lennart Karl hapi serinë e golave pas një aksioni të shpejtë, ndërsa Harry Kane dhe Diaz vulosën fitoren me finalizime precize që konfirmuan forcën e pamëshirshme të sulmit bavarez. Loja e rrjedhshme dhe presioni i lartë i Bayernit nuk i la asnjë hapësirë belgëve, të cilët u dorëzuan përballë ritmit të kampionëve të Gjermanisë.
Trajneri i Bayern-it u shfaq i kënaqur pas takimit, duke theksuar se “ekipi po gjen ekuilibrin ideal mes efikasitetit dhe kontrollit të lojës”.
Në mbrëmjen europiane nuk munguan as rezultatet e bujshme: Chelsea mposhti Ajax-in me shifrat 5-1 në “Stamford Bridge”, ndërsa Liverpool-i triumfoi në transfertë ndaj Eintracht Frankfurt me të njëjtin rezultat 1-5. Dy ndeshje, ajo mes Atalanta–Slavia Prague dhe Monaco–Tottenham, përfunduan pa gola.
Me këtë fitore, Bayerni forcon pozitat në krye të grupit dhe konfirmon se mbetet një nga favoritët kryesorë për trofeun më të rëndësishëm europian për klube.
