Në një zhvillim të ri në konfliktin Izrael-Palestinë, Hamas ka deklaruar se është i gatshëm të lirojë të gjithë pengjet izraelite dhe t’i dorëzojë administrimin e Gazës një trupe teknokratësh palestinezë, sipas një propozimi paqeje të paraqitur nga presidenti amerikan Donald Trump.
Lëvizja palestineze ka konfirmuar gatishmërinë për të negociuar me ndërmjetësit, por thekson se disa pika të planit kërkojnë sqarime të mëtejshme.
Ndërkohë, dhuna në terren është përshkallëzuar. Sipas burimeve mjekësore, të paktën 72 palestinezë janë vrarë nga sulmet ajrore dhe bombardimet izraelite që nga agimi i ditës së sotme, mes tyre 42 vetëm në qytetin e Gazës.
Administrata e Trump ende nuk ka dhënë një reagim zyrtar ndaj përgjigjes së Hamasit, megjithëse më herët ka paralajmëruar se refuzimi i planit do të sillte “pasoja shumë të rënda”. Sipas planit me 20 pika, Gaza do të qeverisej përkohësisht nga një qeveri teknokratike palestineze, ndërsa Izraeli do të tërhiqej plotësisht nga enklava pa e aneksuar atë.
Kritikët, megjithatë, kanë shprehur dyshime mbi zbatueshmërinë e marrëveshjes, duke kujtuar shkeljet e përsëritura të armëpushimeve nga Izraeli në të kaluarën.
Aktivistja për të drejtat e njeriut Lara Elborno theksoi se “mungon një mekanizëm për ta detyruar Izraelin të zbatojë detyrimet e tij” edhe në rast se marrëveshja miratohet.
Ndërkohë, presidenti palestinez Mahmud Abbas ka përsëritur angazhimin për të organizuar zgjedhje të përgjithshme një vit pas përfundimit të luftës, duke theksuar rëndësinë e konsensusit kombëtar dhe mbështetjes ndërkombëtare për shtetin e ardhshëm palestinez.
Burimi: Al Jazeera
