Kryeministri i Francës, François Bayrou, njoftoi se më 8 shtator do t’i nënshtrohet një vote besimi në Asamblenë Kombëtare, duke vënë në rrezik mandatin e tij në një moment të tensionuar politik e ekonomik.
Vendimi i tij lidhet me buxhetin e ri të vitit 2026, i cili parashikon masa shtrënguese në vlerë prej 40 deri në 44 miliardë eurosh, përfshirë heqjen e dy ditëve të pushimit, ngrirjen e shpenzimeve sociale dhe rritjen e taksave për më të pasurit, me synimin për të ulur deficitin publik që në vitin 2024 arriti 5.8% të PBB-së, tej kufijve të përcaktuar nga Bashkimi Evropian.
Bayrou e formuloi këtë hap sipas nenit 49.1 të Kushtetutës franceze, duke i kërkuar parlamentit që të shprehet mbi politikën e tij të përgjithshme. Por reagimi i forcave politike ishte i menjëhershëm dhe i ashpër: Rassemblement National deklaroi se nuk do të japë mbështetje, La France Insoumise, të Gjelbërit dhe komunistët u pozicionuan qartazi kundër, ndërsa kryetari socialist Olivier Faure e cilësoi “të paimagjinueshme” dhënien e votës pro qeverisë. Ky bllokim e bën praktikisht të pamundur sigurimin e shumicës.
Pasojat u ndjenë menjëherë edhe në ekonomi: bonot shtetërore franceze ranë ndjeshëm, ndërsa norma e interesit e obligacioneve dhjetëvjeçare u rrit mbi 3.5%, me diferencën ndaj Gjermanisë që u zgjerua, duke reflektuar rritjen e pasigurisë politike.
Qeveria Bayrou, e formuar në dhjetor 2024 pas rrëzimit të kabinetit të Michel Barnier, nuk ka arritur kurrë të sigurojë një shumicë të qëndrueshme dhe është mbështetur në manovra kushtetuese për të kaluar buxhetet. Tani, ajo përballet me një provë që mund të sjellë rënien e saj.
Burimi: CNN
