Ish-Zonja e Parë e Koresë së Jugut, Kim Keon-Hee, është arrestuar pas një vendimi të gjykatës së Seulit që miratoi kërkesën e prokurorisë për lëshimin e një urdhri arresti ndaj saj, duke argumentuar se ekzistonte rreziku i manipulimit të provave.
Ky zhvillim shënon një rast historik për vendin, pasi për herë të parë një çift presidencial gjendet njëkohësisht nën arrest: bashkëshorti i saj, ish-presidenti Yoon Suk-yeol, ndodhet në paraburgim që prej muajit prill, i akuzuar për rebelim dhe abuzim me pushtetin.
Kim Keon-Hee përballet me një sërë akuzash që përfshijnë manipulimin e tregut të aksioneve, marrjen e ryshfeteve dhe ndikimin e paligjshëm në procesin politik. Prokuroria e akuzon se midis viteve 2009 dhe 2012 ka ndikuar në çmimin e aksioneve të kompanisë distributore të BMW, Deutsch Motors, si dhe se ka ndërhyrë në përzgjedhjen e kandidatëve të partisë për zgjedhjet e vitit 2022.
Një pjesë e akuzave lidhen gjithashtu me marrjen e dhuratave luksoze, përfshirë një varëse diamanti Van Cleef, çanta Chanel dhe bizhuteri të tjera nga grupe dhe individë të lidhur me Këshillin e Kishës së Unifikimit, si dhe kompani ndërtimi, në këmbim të favoreve politike. Kim ka mohuar të gjitha akuzat, duke pretenduar se varësja ishte një kopje e vjetër dhe jo origjinale, por hetuesit thonë se kanë prova të kundërta.
Skandali është thelluar edhe më tej pas vendimit të institucioneve akademike për t’i revokuar asaj gradat master dhe doktoraturë, pasi është vërtetuar plagjiaturë në të dyja punimet e saj.
Arrestimi i Kim Keon-Hee është një goditje e rëndë për imazhin publik të çiftit ish-presidencial dhe ka hapur një kapitull të ri në historinë politike të Koresë së Jugut, ku për herë të parë një ish-president dhe bashkëshortja e tij përballen njëkohësisht me drejtësinë për akuza të rënda që mund të sjellin dënime të gjata me burgim, e në rastin e Yoon Suk-yeol, edhe dënim kapital.
