Në një sallë ankandi në Paris, heshtja u përthye nga emocioni ndërsa shifra ngjitej si në një garë të çmendur. Fillimisht 1 milion euro… pastaj 3… 5… dhe papritur, 8.6 milionë euro! Me një “klik” të fundit në telefon, një ofertë që u bë histori: çanta origjinale “Birkin”, e dizenjuar për Jane Birkin në vitin 1984, u shit për rreth 10.1 milionë euro – duke u kthyer në çantën më të shtrenjtë të shitur ndonjëherë në ankand.
Por kush ishte njeriu në anën tjetër të linjës?Shinsuke Sakimoto, një ish-futbollist japonez që hoqi dorë nga sporti në moshën 22‑vjeçare për të ndjekur një ëndërr tjetër: biznesin. Sot, ai është CEO i Valuence Japan, një kompani që specializohet në blerje dhe rishitje të artikujve luksozë – dhe tashmë, edhe një nga emrat më të përfolur në botën e modës pas kësaj blerjeje spektakolare.
“Kur e bëra ofertën përfundimtare, ndjeva sikur më iku stomaku,” tha Sakimoto më vonë. “Ishte një miks emocionesh mes eksitim, frikë dhe përgjegjësi.”
Çanta e famshme “Birkin” nuk ishte një impuls personal, por pjesë e një strategjie të menduar. Sakimoto e cilëson veprimin si një investim simbolik: jo për ta mbajtur në dollap, por për ta ruajtur dhe ekspozuar publikisht, si pjesë e një filozofie të re për pronësinë e objekteve ikonike – jo më për t’u fshehur në shtëpi private, por për t’u ndarë me publikun.
“Blerja është një deklaratë për vlerën që bartin objektet e trashëgimisë kulturore. Nuk është një çantë. Është një pjesë historie,” – tha ai. Dhe për Valuence, ekspozimi i çantës është vetëm fillimi. Sakimoto beson se ky moment do të sjellë “miliarda yenësh në reklamë indirekte” për markën e tij.
Çanta – prototipi i parë i krijuar ndonjëherë për Jane Birkin nga Hermès – është e mbushur me detaje personale: inicialet “J.B.” të stampuara brenda, një dizajn unik me rrip të pasmë dhe ngjyrë të zverdhur nga koha. Ishte pikërisht kjo histori dhe pesha kulturore që i dha vlerën miliona-euroshe.
Në një epokë ku investimet bëhen në kriptovaluta dhe aksione, Sakimoto zgjodhi të investojë në një objekt që nuk ka vetëm vlerë materiale, por shpirt dhe identitet. Dhe për këtë arsye, edhe emocionet ishin të larta. Shifra ishte marramendëse. Por, ndoshta për një milioner me vizion, emocionet vlejnë më shumë se miliona.
Burimi: Bloomberg, NYPost, CNN
