CEO i OpenAI u bën thirrje përdoruesve të mos ndajnë detaje personale në bisedat me AI, pasi ato nuk janë të mbrojtura ligjërisht dhe mund të përdoren kundër tyre.
Në një deklaratë që ka ngjallur shumë diskutime, Sam Altman, drejtuesi i kompanisë OpenAI, paralajmëroi se bisedat që përdoruesit bëjnë me ChatGPT nuk janë konfidenciale dhe, në rrethana të caktuara, mund të përdoren si prova në gjykatë.
Altman shpjegoi në një intervistë të fundit se shumë njerëz e trajtojnë ChatGPT-në si një psikolog apo këshilltar, duke ndarë informacione shumë personale, pa e kuptuar se këto biseda nuk gëzojnë mbrojtje ligjore, siç është rasti me një mjek, avokat apo terapist.“
Nëse bën një bisedë me ChatGPT dhe mendon se ajo është private si me një terapist, e ke gabim. Ligjërisht, nuk është e mbrojtur. Dhe kjo është shumë e gabuar,” – tha Altman.
Jo konfidenciale. Jo të paprekshme.
Bisedat me inteligjencën artificiale, përfshirë edhe ato që përdoruesi mund t’i ketë fshirë, mund të ruhen nga kompania dhe, në rast nevoje ligjore apo kërkese nga një gjykatë, OpenAI mund të detyrohet t’i dorëzojë. Në të njëjtën mënyrë siç veprohet me mesazhet, email-et apo të dhënat nga rrjetet sociale përdoren në hetime apo çështje ligjore.
Në fakt, OpenAI aktualisht është përballur me një rast gjyqësor nga “The New York Times”, ku është urdhëruar që të ruajë të gjitha të dhënat e përdoruesve pa afat. Kjo nënkupton që edhe bisedat që përdoruesit mendojnë se janë zhdukur, mund të ekzistojnë ende në serverë.
Nevojë për mbrojtje të re ligjore
Altman theksoi se duhet një kornizë e re ligjore që të mbrojë privatësinë e përdoruesve të AI — e ngjashme me atë që gëzojnë pacientët apo klientët ligjorë. Por deri atëherë, çdo bisedë që zhvillohet me një sistem si ChatGPT duhet të shihet si e rrezikshme për t’u ndarë, nëse përmban të dhëna të ndjeshme.
Kujdes çfarë ndani!
Teknologjia po zhvillohet me ritme të shpejta, por ligji nuk ka ecur në të njëjtin hap. Në këtë boshllëk e paqartësi ligjore, përdoruesit duhet të jenë të kujdesshëm dhe të vetëdijshëm: ajo që shkruani në një bisedë me ChatGPT mund të jetë arma që dikush përdor kundër jush në të ardhmen.
Prandaj, mendohuni dy herë para se të ndani histori personale, sekrete apo detaje të ndjeshme në bisedat me inteligjencën artificiale. Teknologjia nuk është avokati e as psikologu juaj. Ende jo.
