Dita nis me diell dhe përfundon me diell. Temperaturat në shumë qytete të Shqipërisë kanë kapërcyer 40 gradë Celsius, duke e kthyer vapën në sfidën kryesore të kësaj vere.
Në një klimë që duket gjithnjë e më e nxehtë, mbrojtja ndaj temperaturave ekstreme nuk është vetëm çështje rehatie, por edhe e shëndetit.
Ndaj ja disa këshilla të thjeshta, që mund t’i bëjnë këto ditë përvëluese më të lehta për secilin prej nesh:
Pini ujë, më shumë se zakonisht: Trupi ynë ka nevojë për hidratim të vazhdueshëm, edhe kur nuk ndjejmë etje. Pijet freskuese apo alkooli mund të duken joshëse, por janë uji dhe lëngjet natyrale ato që ndihmojnë më shumë.
Shmangni diellin në orët më të nxehta: Nga ora 11:00 deri në 17:00 është më mirë të qëndroni në ambiente të freskëta. Një shëtitje mund të presë derisa dielli të fillojë të perëndojë.
Vishni rroba të lehta, ngjyra të çelëta dhe materiale natyrale: Pambuku është miku më i mirë i verës.
Mbani freskët shtëpinë: Mbyllni grilat gjatë ditës për të mos lejuar diellin të hyjë dhe hapni dritaret në mbrëmje për të shijuar sadopak freski.
Kujdes për më të vegjlit dhe të moshuarit: Ata janë më të ndjeshëm ndaj nxehtësisë dhe shpesh nuk arrijnë të tregojnë shenjat e para të lodhjes apo dehidratimit. Tregohuni të vëmendshëm ndaj tyre!
Shmangni aktivitetin fizik në pikun e vapës: Një shëtitje e lehtë në mëngjes ose në mbrëmje është gjithmonë një zgjedhje më e mirë.
Dhe mbi të gjitha, dëgjoni trupin tuaj! Nëse ndiheni të lodhur, të përgjumur apo keni marrje mendsh, mos e injoroni – këto janë shenja që tregojnë se vapa po ndikon më shumë se duhet.
Këto ditë të nxehta do të kalojnë, por deri atëherë, le t’i përballojmë me kujdes dhe me mendje të ftohtë – për veten tonë dhe për ata që kemi pranë.
