Ekonomia e Shteteve të Bashkuara po tregon forcë dhe qëndrueshmëri, edhe pse po përballet me sfida të shumta si tensionet tregtare, inflacioni dhe ulja e shpenzimeve të konsumatorëve. Ky është përfundimi i një analize të fundit mbi gjendjen ekonomike në vend.
Tregjet financiare janë në rritje të qëndrueshme. Indeksi i njohur S&P 500 ka shënuar një rekord të ri historik, falë optimizmit të investitorëve dhe rritjes së vazhdueshme të sektorëve si teknologjia dhe energjia e pastër. Kompanitë po shtojnë investimet në makineri dhe teknologji moderne, duke sinjalizuar besim në të ardhmen ekonomike afatgjatë.
Nga ana tjetër, rritja e Produktit të Brendshëm Bruto (PBB) pritet të jetë vetëm 0.8% për gjysmën e parë të vitit 2025, çka tregon një ngadalësim të ritmeve të zhvillimit. Po ashtu, shpenzimet e konsumatorëve – të cilat përbëjnë një pjesë të madhe të ekonomisë amerikane – janë në rënie, veçanërisht për mallrat jo të domosdoshme dhe shërbimet.
Ekspertët thonë se pavarësisht performancës së mirë të tregjeve, situata reale për qytetarët mbetet e ndërlikuar. Kostoja e jetesës është ende e lartë, normat e interesit janë ngritur dhe kreditë janë bërë më të shtrenjta, duke detyruar shumë familje të jenë më të kujdesshme në mënyrën si shpenzojnë.
Ndërkohë, tensionet tregtare me Kinën dhe tarifat e reja për importet mund të sjellin sfida të reja për eksportuesit amerikanë. Sipas analistëve, politika ekonomike në gjysmën e dytë të vitit do të duhet të fokusohet në ruajtjen e ekuilibrit ndërmjet zhvillimit dhe stabilitetit.
Në këtë klimë të pasigurt, bizneset po adaptohen duke investuar në teknologji dhe automatizim, ndërsa investitorët po mbajnë një qëndrim të matur për të parashikuar zhvillimet e ardhshme.
Ekonomia amerikane nuk është në krizë, por ndodhet në një moment sfidues. Ajo po ecën përpara – ngadalë, por me këmbëngulje.
E pёrshtatur nga: Jeanne Whalen, Justin Lahart dhe Te-Ping Chen, “U.S. Economy Shrugs Off Trade War and Soldiers On”, The Wall Street Journal, 27 qershor 2025. https://www.wsj.com/economy/u-s-economy-shrugs-off-trade-war-and-soldiers-on-e4d18881?mod=economy_lead_story
