Një prej çifteve legjendare të Hollywood, Angelina Jolie dhe Brad Pitt, do përballen për herë të fundit në sallën e gjyqit, në përmbyllje të një beteje përfundimtare gjyqësore për një kantinë franceze (Château Miraval) që e blenë në 2008.
Aktorët e famshëm zhvilluan një proces të gjatë gjyqësor prej tetë vitesh, pasi u divorcuan në 2016. Pasi ndanë përkatësinë e pasurisë së madhe, “sherri” i fundit i ka mbetur te pronësia e kantinës franceze, që Jolie ia shiti një rusi pa miratimin e Pitt.
Çifti i bujshëm i komedisë aksion, “Mr. & Mrs. Smith”, xhiroi skena pothuajse reale në filmin e vitit 2005, kur ata përveçse aktruan edhe u dashuruan në mënyrën e tyre hollywoodiane.
Një nga skenat më emblematike të këtij filmi, ka hyrë në fondin e artë të kinematografisë botërore. Të gjithë admiruan çiftin perfekt Jolie & Pitt, teksa i panë të dashuronin njëri-tjetrin me pasion, elegancë dhe plot shkëlqim.
Befas, ata u kthyen si gjithë të zakonshmit, u bënë një kujtim…
Paradoksi i dashurisë dhe urrejtjes përfundoi në gjykatë, aty ku lufta dhe paqja për dashurinë i la vendin luftës për prona dhe para.
